Sabtu, 01 April 2017

Kolo Bi Leop-leop Oe

Foto: Koleksi pribadi.

Neon mabe nane, ulan sit-sit. Kol koa’a nkoa babaun na’ko hau nunuh. Kolo lukeb ma kol unub fe’an um in hanan. Anin ma oetene n’nao nabuan; ntam ume-ume, napau nekaf-nekaf. Nek malile ma nek susal; amanit ma akaet. Anao ‘lot ma apao kuan mamnaunin tukam-tuk. Maut bae, monik i, mani nok susal n’nao nabuan. Fe es-esat nasikan lalan. Lal manuat ma lal ma’lelat. Fun’a monik nane nasikan lalan, fe es-esat hit ka tabe’fa le susal nane; fun monik nane na’hepes kit.

Am Kolo nok Ain Sila ntok nabua nbi ume Suba. Ulan nane fe’ sit-sit. Ul kumafu lo in he nsai babaun. Am Kolo nkais in’a kais meto; nsi lumat ma n’umauk nok. Ain Sila napau pena, ini msat nsi babaun natuin in’a naef. “Au anah feto mese, utame he naskol, naskol hen lain kase he n’naota slaelaha bemo. Utame neo SMP, napipit naenan npoe, npoe hen nmatsao, nsao nanaha Konjak he n’naotan saela oto”.
Nalail sit nanet, ulkumafu msat fe’ka nasnas. Ain Sila napen Am Kolo he nsin ten. “Msi manam ten kit bae Kolo”. Naleok bae Sila.Nait mubeko ho aom”. Am Kolo nkais ma nsin ten. In nabeko in aona oke. Ain Sila msat npao le kasi nane hanan he n’si natuin ma nabeko in aon. Am Kolo na’uab laun neo Ain Sila neo sina’ monik unu. “Unu nane ho ait mail museke kau. Nbi feset mabe nane, ho lo mailaha kau”.

Ain Sila msat nataunon. “Aike bae Kolo, mabe nane ho ait maenam ek au nekak. Bait he uskol, one lail kase naek”. Am Kolo nok Ain Sila nsin piut “Fitsa ho tai ana liat, nina bae nina noi. Bikaubas mumolok bae nina noi, mansa nak a’oeton bae nina noi, ete’ haek eu ho nesu bae nina noi, amaf natau nan ko, amaf natau nan ko. Fontom poi mupen kau bae feot mese, mupene mit mulail kau, fanit on kamit kau bae, ho moe kau nek’e namen. Kasasanes feot mese, nina bae nina noi. Kolo biloep-leop oela feto, ho oum he muloepam ten kau feot mese, namitan mahun, namet namuin.

Am Kolo nok Ain Sila sin sit nane ntom. Muni i, liana skol fe es-esat naneop tuka, fun napen naseke tivi ma na’bae naseke HP. Amaf nok ainaf naen nu nem he naim loet he naskol, me, liana nane ka naneop nanfa le ainaf nok in amaf in susal. Liana nane neno-neno in’a ntup nabala Kos, napen tivi ma nabae HP. Kalo’ liana nane SMS in pacar he nem. Funan teon amnemat, in’a n’naotan ntu’aha in tain fun na’aup. Skol nane naen nasaitan. Sulat ma ‘tui mapolen. Ainaf nok amaf n’mof nalailnen. Liana nane naskol onaha kolo bileop-leop oe. Na’moe nalalit na’moe nten. Nane in ait naim in susal neo in aona ma in amaf nok ainaf. ***

Tulisan ini pernah menjadi rubrik bahasa Dawan yang diterbitkan Majalah Warta Flobamora.
Share:
Posting Komentar